میں ہوں ناں (افسانچہ) ✒️ پینٹر نفیس

1️⃣1️⃣

میں ہوں ناں

افسانہ نِگار ✒️ پینٹر نفیس

ایونٹ نمبر 55 🧏‍♀️🧏🏻 بھائی بہن

کُل ہِند افسانہ نگار فورم

کی پیشکش

افسانچہ نمبر 11

وہ دونوں نابینا بھائی بہن ایک دوسرےکے سہارے لاٹھی ٹیکتے دھیرے دھیرے چلتے ہوۓاپنی مخصوص جگہ آبیٹھے۔ بیٹھتے ہی بوسیدہ تھیلی سے سال خوردہ کٹورانکال کر آگے رکھ دیا۔یہ آج کا نہیں گذشتہ پندرہ برسوں سے ان کا معمول ہے۔ ریلوے اسٹیشن قریب ہونے کی وجہ سے مسافر انہیں کچھ نہ کچھ ضروردے جاتے ۔ابھی انہیں بیٹھے ہوۓچند ساعت ہی گذری تھی کہ سفر سے واپس آنے والےمیاں بیوی کے ایک جوڑےنے بچے ہوۓوڑا پاؤ ان دونوں کو تھماتے ہوۓ آگے بڑھ گئے۔

”کمالو۔۔۔ کمالو۔۔۔“ بہن نے کھانستے ہوئے کہا۔
”کیا ہے مہرن آپا۔۔۔“ کمالو نے مہرن کی طرف چہرہ گھما کر کہا ”کیا بول رہی ہے آپا۔۔۔“
”کھا لیا کیا۔۔۔؟“
”ہاں آپا۔۔۔کھا لیا۔۔۔“
”یہ لے۔۔۔ اسے بھی کھا لے۔۔۔“ مہرن نے وڑا پاؤ آگے بڑھاتے ہوئے کہا۔
”ارے تونے یہ بھی نہیں کھایا۔۔؟“ کمالو اپنی بے نور آنکھوں کو سکیڑتے ہوۓکہا۔
”نہیں۔۔۔ میں نہیں کھاؤں گی۔۔۔ میرا منہ کڑوا ہوگیا ہے۔۔۔“ مہرن نے بوسیدہ آنچل سے پسینہ پونچھتے ہوئے کہا۔
”ایک تو پہلے ہی دو دن سے بیمار ہے۔۔۔کچھ کھائے گی نہیں تو کمزوری اور بڑھے گی۔۔۔صبح سے کتنا بخار بھی ہے۔۔۔“
”تو میری فکر مت کر۔۔۔۔ مجھے کچھ نہیں ہوا ہے۔۔۔تو پانی پیا کیا۔۔۔“
”نہیں۔۔۔“
”یہ لے۔۔۔“ مہرن نے بوسیدہ کمنڈل میں رکھے پانی کو آگے بڑھاتے ہوئے کہا ”لے سنبھال اسے۔۔۔“
”ہاں لادے۔۔۔“
”سر پر کپڑا رکھاکیا۔۔۔“
”نہیں ابھی رکھتاہوں۔۔۔“
”کیسا لاپرواہ ہے تو۔۔۔ دھوپ سے برا حال ہے۔۔۔ سر ڈھانک لے۔۔۔“
”آپا۔۔۔“ کمالو نےپانی پیتے ہوئے کہا ”دھوپ میں تو تجھے نہیں آنا تھا۔۔۔ میں ہوں ناں۔۔۔ آجاتااکیلا دھیرے دھیرے۔۔۔ تجھے تو آرام کرنا تھا۔۔۔“
”ارے پگلے۔۔۔“مہرن نے جھٹ کہا ”میں اگر آرام کرتی تو یہاں پر تیرا خیال کون رکھتا۔۔۔۔“
✍️✍️✍️