سنو گستاخ لوگو! ابھی ہم کو جگانا مت ✍️خان حسنین عاقب

سنو گستاخ لوگو! ابھی ہم کو جگانا مت

✍️خان حسنین عاقب

سنو گستاخ لوگو !

ابھی ہم سورہے ہیں

ابھی ہم کو جگا نامت

ابھی ہم تفرقوں اور نشہ ء تفریق میں گم ہیں

ابھی ہم شجرہ ء اجداد کی تحقیق میں گم ہیں

ابھی ہم شدتِ مسلک کی تابانی میں گم ہیں

ابھی ہم دولت دنیا، تن آسانی میں گم ہیں

سنو گستاخ لوگو!

ابھی ہم سور ہے ہیں

ابھی ہم کو جگانا مت

ابھی مغلوب ہیں ہم نغمہ ء گل، چشمِ نرگس سے

ہمارے ذہن ہیں مخمور

ابھی شعری مجالس سے

گویے اپنے احساسات کی تسکین کرتے ہیں

کوئی کل ہند نوٹنکی کبھی بے دین کرتے ہیں؟

ہماری نیند میں کوئی خلل نہ ڈالنے پائے

جو ہم سے متفق ہو ، آج وہ بھی جاکے سوجائے

سنو گستاخ لوگو!

ابھی ہم سور ہے ہیں

ابھی ہم کو جگانامت

ابھی ہم ٹی ویوں اور بیویوں میں گم ہیں،

رہنے دو

ہمیں کچھ لوگ بے حس کہہ رہے ہیں ،

ان کو کہنے دو

ابھی تک ہم مغل ہیں ، خان ہیں،

مرزا ہیں ، سید ہیں

ابھی تک چاردیواری میں ہم اپنی مقید ہیں

سنو گستاخ لوگو!

ابھی ہم سور ہے ہیں

ابھی ہم کو جگانامت

لگے گی آگ اگلے گھر ، یہاں پہنچی نہیں ہے

ہمارا گھر تو ہے محفوظ

ابھی سے جلد بازی یہ

بہت اچھی نہیں ہے

کہیں کچھ لوگ اپنے قتل ہوتے ہیں تو ہونے دو

ابھی ہم سور ہے ہیں،

ہم کو گہری نیند سونے دو

سنو گستاخ لوگو!

ابھی ہم سور ہے ہیں

ابھی ہم کو جگانا مت

خیالِ وحدتِ امت ابھی تک دور ہے ہم سے

وجودِغیرتِ مؤمن

بہت رنجور ہے ہم سے

اگرچه صورتِ تعداد میں مسلم بکثرت ہیں

حقیقت تو یہ ہے ہم اک زوال آمادہ امت ہیں

سنو گستاخ لوگو!

ابھی ہم سور ہے ہیں

ابھی ہم کو جگانامت!!!!

----------------------------------