ڈاٹ کام

ڈاٹ کام

ڈاکٹرمحمد رفیق اے ایس

ہر زمانہ اپنی تکمیل کے لیے ضرورتوں کو جنم دیتا ہے۔زمانہ اورضرورتیں لازم و ملزوم ہیں۔ کبھی یہ وقتی اور کبھی قائم صورت میں رہ کر اپنے وجود کا مظاہرہ کرتی ہیں۔ زمانہ قدیم کی اپنی ضرورتیں محدود تھیں۔ انسان نے اپنی تہذیب و تمدن میں رہ کر صرف ان ہی چیزوں کو اپنی ضرورت سمجھا جس سے زندگی کا گزر بسر آسان ہو جائے۔ لیکن بڑھتی ہوئی آبادی ، تعلیم کا سیلاب ، معلومات کے خزانوں کا افشاں ہونا اور برق رفتار ترقی نے پھر نئی ضرورتوں کو جنم دیا۔ عصر حاضر کی ضرورتیں لامحدود ہیں۔ جدید سائنس اور ٹیکنالوجی نےاپنی تیز رفتاری اور پرفیکشن سے ہر شعبۂ زندگی میں دھوم مچادی۔ آج الکٹرونیک مختلف صورتوں میں انسان کی بنیادی ضرورتوں میں شامل ہوگئی ہے۔

ریحان کوثر صاحب کی کتاب "ڈاٹ کام " الکٹرونک ٹیکنالوجی کے منہ بولتے جادو "کمپیوٹر " سے متعلق تمام تر جدید معلومات سے مزین ہے جسے مصنف نے بڑی ہی عرق ریزی، انتھک محنت اور خلوص سے قارئین کے روبرو پیش کیا ہے۔ اس میں کوئی شک نہیں ہے کہ یہ کتاب کمپیوٹر سیکھنے والے طلبہ یا وہ نوجوان جو اس فیلڈ میں اپنا کیرئیر بنانا چاہتے ہیں ان کے لیے نہایت ہی مفید ہے۔ کمپیوٹر سے متعلق وہ تمام معلومات جو ایک طالب علم چاہتا ہے موصوف نے فراہم کردی ہے۔ کتاب کی زبان آسان ہے۔ موزوں اصطلاحات ، واضح تصاویر اور حسب ضرورت سائیڈس بھی ملاحظہ کے لیے دی گئی ہیں۔

انٹرنیٹ آج ہر با شعور تعلیم یافتہ کے لیے لازمی ہو گیا ہے۔ مصنف نے انٹرنیٹ سے متعلق بہت ہی سلجھے ہوئے انداز میں اور تفصیل سے تحریر کیا ہے جو یقینا ً نو مشقوں کے لیے مشعل راہ ثابت ہوگا۔ موصوف نے جابجا نوجوانوں کو الکٹرونک ٹیکنالوجی سے مثبت استفادہ کی درخواست کی ہے جس سے ان کے حسن اخلاق کا پتہ چلتا ہے۔

اس حقیقت سے اب انکار نہیں کیا جاسکتا کہ اردو زبان میں جدید خطوط پر کتابیں مرتب کرنے کا آغاز ہو چکا ہے۔ غالبا ً تمام شعبہ جات میں کتابیں دستیاب ہیں۔ اب ضرورت اس بات کی ہے کہ ہم اپنے بچوں کو مطالعہ کی طرف راغب کریں۔

میں ریحان کوثر صاحب کو اس کارنامے پر مبارکباد پیش کرتا ہوں اور قومی کونسل برائے فروغ اردو زبان نئی دہلی کے عہدہ داران و اراکین کو بھی مبارکباد پیش کرتا ہوں جن کی معاونت سے یہ کتاب منظر عام پر آئی۔

٭٭٭