رشتے(افسانچہ )✒️حافظ مزمل اطہر حسنی

1️⃣6️⃣

رشتے

افسانہ نِگار ✒️حافظ مزمل اطہر حسنی

ایونٹ نمبر 55 🧏‍♀️🧏🏻 بھائی بہن

کُل ہِند افسانہ نگار فورم

کی پیشکش

افسانچہ نمبر 16

"بھیا ۔۔۔

بازو والے گھر کے سارے بچوں کے پاس سائیکل ہے ۔مجھے بھی دلا دیجیے نا بھیا ۔۔۔ پلیز !!!"

"طوبیٰ ! میری بات تو سمجھ بیٹا ! اس مہینے بس رک جا ۔ میں اس مہینے کی تنخواہ سے اپنی کالج فیس بھر دیتا ہوں اور اگلے مہینے پکا تیری سائیکل ۔۔۔۔۔"

سلیم نے اپنی لاڈلی چھوٹی بہن کو پھر ایک بار دلاسہ دیتے ہوئے بات ٹالنا چاہا مگر سات سالہ طوبیٰ نے خاموشی توڑتے ہوئے کہا 

"پر بھیا ! راکھی کے دن مونا اور رادھا کے بھائی بھی انھیں سائیکل گفٹ کرنے والے ہیں ۔ کاش پاپا زندہ ہوتے تو وہ مجھے اتنا انتظار نہ کرواتے۔ "

اتنا کہہ کر طوبیٰ دوڑتے ہوئے باہر کھیلنے چلے گئی ۔ 

پڑھائی کے ساتھ ساتھ گھر بھی سنبھالنے والے سلیم کو یہ جملہ تن بدن میں سنسناہٹ پیدا کر گیا ۔ اور اس نے فیصلہ کیا کہ اب لیٹ فیس کے ساتھ آئندہ مہینے کالج فیس ادا کرے گا اور آج ہی رات کو طوبیٰ کے لیے نئی سائیکل خرید کر لائے گا ۔ 

جب رات کو سلیم ایک خوبصورت سائیکل کے ساتھ گھر میں دستک دیتے ہوئے داخل ہوا تو طوبیٰ کی خوشی کی انتہا نہ رہی وہ جھٹ پٹ بھائی کے پیروں سے لپٹ گئی اور اپنی نئی سائیکل کا اوپر نیچے دائیں بائیں سے بغور معائنہ کرنے لگی ۔ اِدھر سلیم ، طوبیٰ کو خوش دیکھتے ہوئے خوشی سے جھوم رہا تھا ۔ تب ہی کسی نے اس کی پیٹھ تھپتھپائی ۔ اس نے جوں ہی پیچھے دیکھا تو ماں اپنے مسکراتے چہرے کے ساتھ اپنے ہاتھ میں ایک لفافہ لیے کھڑی تھی ۔ ماں نے وہ لفافہ سلیم کو دیتے ہوئے کہا

"اور۔۔ یہ رہا تمہارا گفٹ !!!"

"ماں یہ کیا ہے؟؟؟ " سلیم نے پوچھا ۔

"تمہاری کالج فیس " 

سلیم کے اندر احساسات کی ایک لہر دوڑ پڑی اور اس نے ماں سے پوچھا " پر ماں !! آپ نے پیسوں کا انتظام کہاں سے کیا؟؟"

ماں نے اپنے پیارے انداز میں سَر پر ایک ہاتھ مارتے ہوئے کہا "کتنی بار تجھ سے کہا ہے کہ آم کھایا کر ۔۔ پیڑ کیوں گنتے ہو ؟؟؟"

✍️✍️✍️