چپکے سے (افسانچہ ) ✒️ پینٹر نفیس

8️⃣

چپکے سے

افسانہ نِگار ✒️ پینٹر نفیس

ایونٹ 52 🤦🏻‍♀️💁🏻‍♂️ فیملی ڈرامہ

کل ھِند افسانہ نِگار فورم

کی پیشکش

افسانچہ نمبر 8

گھر میں داخل ہونے سے پہلے ہی ماں اور چھوٹی بہو کے چلّانے کی آواز کانوں سے ٹکرائی یہ نوک جھونک آج کی نئی بات نہیں ہے۔

”اب کیا ہے۔۔۔؟“ میں نے ناگواری سے پوچھا۔

”ہونا کیا ہے۔۔۔ “ ماں نے غصّے سے کہا ”بچّوں کو بےدردی سےپیٹتی ہے کچھ بولو تو لڑنے کھڑی ہوتی ہے۔۔۔“

”ہاں۔۔۔ہاں۔۔۔مجھے شوق ہواہے۔“چھوٹی بہونے برجستہ کہا۔”بچّے کچھ بھی کریں میں کچھ نہ بولوں۔۔۔“

”تو کیا ایسے مارتے ہیں۔۔۔“ماں نے بھی چلّا کر کہا۔

”دیکھو۔۔۔ میرے بچّے ہیں۔۔۔ میں کچھ بھی کروں تم خاموش رہا کرو۔۔۔“

”اب تیرے بچّے ہوگٸے۔۔۔ میرے کوئی نہیں۔۔۔“

”دیکھو ماں۔۔۔“میں نے درمیان میں کہا ”اس نے کہا ناں کہ اس کے بچّے ہیں۔۔۔ تو پھر تم کیوں بولتی ہو۔۔۔؟“

”ارے۔۔۔۔ توبھی طرفداری کرتا ہے۔۔۔ کیوں ناں بولوں۔۔۔؟“

”ہاں کچھ مت بولنا۔۔۔تم تسبیح لے کرایک طرف خاموش بیٹھی رہا کرو۔۔۔“

”ہاں ہاں۔۔۔ ٹھیک ہے۔۔۔ میں ہی غلط ہوں۔۔۔ جاؤ جو جی میں آۓ کرو۔۔۔ میں کون ہوتی ہوں بولنے والی۔۔۔ میں اب چپ رہوں گی۔۔۔“اتناکہہ کر ماں غصّے میں بھری اپنی مخصوص جگہ جاکر بیٹھ گئی۔

میں اپنے کمرے میں آیاکپڑے تبدیل کرکے منہ ہاتھ دھونے کی غرض سے باتھ روم کی طرف بڑھا۔ماں نے غصّے بھری نظروں سے مجھے دیکھا اور پھر تسبیح گھمانے میں مصروف ہو گئی۔

میں اپنے رویّہ پر نادم تھا واپسی پر ماں کے پاس آکر رکاوہ سر جھکائے بیٹھی رہی میں نے ندامت سے کہا”ماں۔۔۔کھانا کھالو۔۔۔“۔۔مگر وہ اب بھی مجھ سے ناراض تھی کچھ نہ کہا۔میں نے بیٹھتے ہوئے کہا”ماں۔۔۔ میں جانتا ہوں۔۔۔تم غلط نہیں ہو۔۔۔ مگر کیا کریں جہاں بچّے ہوں وہاں شور شرابہ شرارت نوک جھونک تو ہوگی۔۔۔ چلو۔۔۔کھانا کھالو۔۔۔ “میں نے اس کے کاندھے پرہاتھ رکھ تو وہ ایک طرف کو لڑھک گئی۔۔۔

✍️✍️✍️