آج کابچپن آج کی نظمیں | (مڈل اسکول کے بچوں کے لیے) | متین اچل پوری

عرضِ ناشر

ریحان کوثر

الفاظ پبلی کیشن اور ودربھ ہندی اردو پریس کے لیے یہ مسرت اور فخر کا مقام ہے کہ ہم متین اچل پوری صاحب کی ”آج کا بچپن آج کی نظمیں “ ادبِ اطفال کے بیش بہا خزانے کی صورت میں پیش کر رہے ہیں۔
اس بیش قیمتی مجموعے میں کل ایک سو پانچ نظمیں شامل ہیں۔ لائٹر، لفٹ ، خود کار جیسے عصر جدید کے عنوانات اور دیگر کئی عنوانات پر غالباً پہلی بار قلم اٹھا کر خوبصورت اور معنی خیز نظمیں تخلیق کی گئیں۔ ”دودھ کی بوتل“ تو ایک ایسی منفرد نظم ہے کہ اس عنوان پر دنیا کی کسی زبان میں نظم نہیں لکھی گئی۔ اسی طرح پلازمہ کے عنوان سے دو نظمیں شامل اشاعت ہیں۔ اس عنوان پر بھی اردو اور آس پاس کی زبانوں میں کوئی منظوم تخلیق نظر سے نہیں گزری۔
بیشک! موصوف کا تخلیق کردہ ادبِ اطفال عصری تقاضوں سے ہم آہنگ ہے جس میں زبان وادب کی شیرینی، لفظیات کی خوشبو، جذبات و احساسات کی خوبصورت ترجمانی، قوم و ملت کی فکریں، عالمی درد و الم، مذہبی قدریں اور حب الوطنی کے پاکیزہ جذبات کی عکاسی بھی پائی جاتی ہے۔
امید ہے آج کی نظموں کا یہ خوبصورت مجموعہ آج اور کل کے بچوں کو پسند آئے گا۔۔۔
٭٭٭

بچوں کے درمیان

پیارے بچو !

آج ہم آپ کے لیےڈھیر ساری نئی چیزیں لے کرحاضر ہوئے ہیں۔ ہم جانتے ہیں کہ پرانی چیزوں میں آپ کی دلچسپی کم ہوتی جاتی ہے۔ نئی نئی چیزیں آپ زیادہ پسند کرتے ہیں۔

ادب میں بھی نئے مضامین اور نئی نظمیں ہوں تو وہ زیادہ دلچسپی سے پڑھے جاتے ہیں۔

دوستو ! بچوں کے ادب کو لے کراردو دنیا کےادب دوست اس بات کے لیے فکر مند تھے کہ وقت کے تقاضوں کے پیش نظراردو ادب ہمارے آس پاس کی زبانوں کے ادب سے پیچھے رہ گیا ہے۔ اس لیے کہ اس کے مضامین عصری ( وقت کے) تقاضوں کے رنگ میں رنگے ہوئےنہیں ہوتے ہیں۔

الحمدللہ! ہمیں اس بات کا پورا احساس ہے کہ 21 ویں صدی میں آپ کا ادب کیسا ہو۔ لہٰذا آپ کی ذہنی و فکری تربیت اور اپنے وقت کے تقاضوں کو نگاہ میں رکھتے ہوئے ہم نے ادب تخلیق کیا ہے۔

اس ضمن مین 2020 ءمیں آپ کے لیے کہانیوں کی نئی کتاب ”ممتا کی ڈور “ کے عنوان سے شائع کی۔ نیز ماحولیاتی آلودگی، جس نے دنیا کی ناک میں دم کر رکھا ہے اس ماحولیاتی آلودگی کے نئے نئے موضوعات پر گزشتہ دہائی میں ہماری چھ کتابیں منظرِ عام پر آئیں۔ ان نئے موضوعات پر ہماری دو کتابین قومی کونسل برائے فروغ زبان اردو ، نئی دہلی نے شائع کی ہیں اس کے لیے ہم کونسل کے مشکور ہیں۔

اس مرتبہ آج کے مضامین کو لے کر ”آج کا بچپن، آج کی نظمیں“ اس نام سے ہم اپنی نئی کتاب شائع کر رہے ہیں۔ ہم نے اپنی ان نظموں میں زبان و بیان کی مصری گھول کر پیش کرنے کی کوشش کی ہے۔ تاکہ آپ اپنے پسندیدہ چاکلیٹ کی طرح ان نظموں کا آج بھی بار بار مزہ لیں اور کل بھی یہ نظمیں آپ کو یاد رہیں۔ گلوبل وارمنگ اور کورونا جیسے تلخ موضوعات میں بھی ہم نے زبان و بیان کی جومٹھاس گھولی ہے وہ آپ کا من موہ لے گی۔

پیارے بچو ، ادب ہماری زندگی کا آئینہ ہے۔ اس لیے وقت ہماری زندگی کے خاکے میں جو جو رنگ بھرتا ہے ان رنگوں کی جھلک ہمیں اپنے وقت کے ادب میں دکھائی دے۔ تبھی ہم کہہ سکیں گے کہ ہمارا ادب وقت کے ساتھ قدم سے قدم ملا کر چل رہا ہے۔ اگر ایسا نہ ہوا تو وقت ہمیں چھوڑ کر آگے نکل جائے گا۔

ہم آپ کا زیادہ وقت نہ لے کر یہ چاہیں گی کہ آپ ہما رے اس کتاب نما ایوان ادب میں داخل ہو کر چاکلیٹ اور لالی پاپ جیسی نظموں کا لطف لیں۔ نیز یہ کہ نہ صرف لطف لے کر رہ جائیں بلکہ آج کی ان نظموں کے فلیور آپ کو کیسے لگے ، خط کے ذریعے یا نیچے دستیاب ہمارے واٹس ایپ نمبر کے ذریعے ہمیں ضرور معلوم کریں۔

ان دو ذرائع سے اظہار خیال آپ کی ذہنی اور فکری تربیت میں مددگار ثابت ہوگا۔ اور آپ کی رائے جان کر ہمیں دلی مسرت ہوگی۔

متین اچل پوری

اچل پور ، 28 نومبر 2021

موبائل فون ( واٹس ایپ) نمبر

9503199586