عید مبارک ✍️ انیس کیفی

عید مبارک

✍️ انیس کیفی

راویر، جلگاؤں

کہتے ہیں یہی گنگ و جمن عید مبارک
"اے اہلِ وطن اہلِ سخن عید مبارک"

سیمابی فضاؤں کی پناہوں میں پریشاں
اے خستہ و بوسیدہ بدن عید مبارک

اے برقِ تپاں موجِ حوادث کے نظارو!
چمپا و چمیلی و سمن عید مبارک

دزدیدہ نظر حسنِ نگاراں یہ تبسّم
کہتے ہیں یہ کجرارے نیَن عید مبارک

جھولیں گے تیری گود میں ہر وقت مجاہد
شہداء کے امیں دارورسن عید مبارک

دیکھا ہے یہ منظر بھی کہ کل تک تھے جو دشمن
اب وہ بھی ہمیں کہتے نمن عید مبارک

معصوم سے بچّوں کے لبوں پر جو مچلتی
خوش رنگ اے زریّں سی کرن عید مبارک

مسموم فضا کتنی بھی تو آگ لگالے
ہم کہتے رہیں گے اے چمن عید مبارک

کیفی سے یہ کہہ دو کہ ذرا سر کو اُٹھائے
دھرتی سے یہ کہتا ہے گگن عید مبارک

🏵️